Халықаралық Ақтау әуежайында үкімет басшысына өңірдің көлік-логистикалық әлеуеті таныстырылды. Үш жыл ішінде Қазақстан порттары арқылы контейнерлік транзит 3,8 есе өсіп, 42 мың ДФЭ-ге жетті, ал порттардың жалпы өткізу қабілеті жылына 200 мың ДФЭ-ге дейін жеткізілді.
Кеме жасау верфі
Каспий теңізінің жағалауында заманауи кеме жасау верфін салу жоспарлануда. Инвестиция көлемі кемінде 125 млрд теңгені құрайды. YDA Group директорлар кеңесінің төрағасы Хусейн Арслан кәсіпорын кемелерді жобалау мен құрастырудан бастап оларды жөндеуге дейінгі толық циклды орындайтынын мәлімдеді. Верфтің қуаты жылына 8 жаңа кеме шығаруға және 24 кемені жөндеуге мүмкіндік береді. Іске қосылғаннан кейін 1,5 мың тұрақты жұмыс орны құрылады. Технологиялар трансфері, халықаралық стандарттар және оқу орталығы қарастырылған.
Авиациялық-логистикалық хаб Ақтауда
Ақтау әуежайының базасында мультимодальды логистикалық және авиациялық хаб құрылады. Кешен әуе кемелеріне техникалық қызмет көрсету мен жөндеуді, жүк авиациясын, мамандар даярлауды және барлық көлік түрлерінің логистикасын біріктіреді. Жылына 200-ден астам техникалық қызмет көрсету операциясын және 60-қа дейін бояу жұмысын жүргізу жоспарлануда. Жоба 3,5 мың тұрақты жұмыс орнын қамтамасыз етеді.
Құрық портындағы терминал
Құрық портында көпфункционалды терминалдың бірінші кезегі салынады. Guoyou Materials Group компаниясы 470 млрд теңге инвестициялайды. Бірінші кезектің өткізу қабілеті жылына 15 млн тонна жүкке дейін жетеді. Құрылыс 2026–2028 жылдарға жоспарланған, екінші кезең 2029–2031 жылдарға арналған. 2032 жылдан кейін кешеннің толық қуаты жылына 25 млн тоннаға жетеді. Жоба 800-ге дейін жұмыс орнын құрады.
Олжас Бектенов орталық органдар мен облыс әкімдігіне жобаларды уақтылы іске асыруды және мерзімдерді сақтауды қамтамасыз етуді тапсырды.