Алматы қалалық құрылыс бақылау басқармасы Krisha.kz және Korter.kz сайттарына иелік ететін компанияларға қатысты хаттамалар жасады. Бұзушылық үлескерлердің қаражатын тартуға рұқсаты жоқ тұрғын үй нысандары туралы хабарландыруларды жариялаудан тұрды.
Заң бойынша көпқабатты үйлердің құрылысына азаматтардың ақшасын жарнамалау және жинау тек уәкілетті органның тиісті рұқсаты болғанда ғана мүмкін. Бұл сайттардағы тексерілген нысандардың мұндай құжаттары болмаған.
Krisha.kz-ке тиесілі «Колеса» АҚ-ға 1000 АЕК мөлшерінде — 4 325 000 теңге айыппұл салынды. «Флетфай-Казахстан» филиалы (Korter.kz) 500 АЕК, немесе 2 162 500 теңге төлейді.
Басқармада алғашқы нарықтағы тұрғын үйді сатып алудан бұрын құрылысшының барлық рұқсат құжаттарының бар-жоғын тексеру керектігін ескертті. Ақпаратты +7 (705) 896-60-00 нөмірі бойынша анықтамалық WhatsApp-арна арқылы алуға болады. Арнаның жұмыс істей бастағанынан бері оған 10 мыңнан астам өтініш түскен.